L'nvern d'una volta

Da un po d temp ‘n qua
l’nvern i ne pù quel!..
Ie m’lens, sdulzinat…Fals!!
Com i fiori d plastica al supermercat.
Al par ‘nfina che, com un p’nsionat
p’r campar, i dev r’sparmiar
su fred e giaz.

Una volta ‘nveza!...
T t sviav a la matina, e ‘nza p’r star su
a i volev, oltre al coraz
i urli d tò mà.
Da la finè a s  v’dev na nebieta z’lata
lizera com un suspir
che a s  confondev, con ‘l fum di camin dle ca.

‘Ntlà nota, la guaza, a d’avev stes ‘l so linzol
d trina, su d’erba r’nsincita di campi
che mo i parev’n d vetr.
Arent a la stada, ‘l muc d lotam
i fumav com se i pias foch.

Andand vers la scola
t ‘ncontrav di fagoti d strazi che i caminav’n
e sol dop un po,’ t capiv che i ern i to amici.
Sot al pont dla ferovia
di candeli d giaz, grosi com parati
i s spicodav’n ‘n’t’el vot, vers tera
mentr ‘n ti b’tali zelati
le canede, al parev’n le set’le
d scopete fruste
scordate
d’una lavandara distrata.

Un merl, ner com un frin
i rasp ‘nt’l rusch, sot na maz’reta
mentr, r’ndopiat chi sa ‘ndov
un petaros, i son ‘l so campan’din d’arzent.
Na tega d ragn, a picodon tra do brochi
al par na codana d perle
stesa ad asugar.

‘Nvern…
Na volta ier fred!.. Dur!
‘Ngnorant com un pel al contr!
Ma la sò beleza
a t scaldav ‘l cor.


Enzo De Fazio